- بقلم د.عمرو لطفى استاذ علاج الاورام بجامعة عين شمس
حنتكلم عن تاني حاجه مهمه لازم تتصل بدكتورك علشانها بسرعه
جلطات الساقين او الاطراف عموما
عاده الجلطات بتبقي في اورده او شرايين الساقين انما ممكن تحصل في الذراع خصوصا بعد عمليات استئصال الغدد تحت الباط
اسباب الجلطات دي كتير انما حنقول بعضها
بصفه عامه عيان الاورام اثناء العلاج مش بيشرب سوائل كافيه فبالتالي درجه لزوجه الدم بتزيد وبيقي عرضه ان يكون جلطات
قله الحركه والنوم الكتير في السرير بيخلي الدوره الدمويه وخصوصا في الساقين بطيئه جدا وده لوحده كافي لتكوين جلطات
بعض الاورام بحكم مكانها في الحوض بيبقي فيه ضغط علي الاورده والشرايين اللي داخلين الساق من الحوض وبيبقي معدل تكون الجلطات عالي
بعض الاورام لوحدها كده بنفرز مواد تزود لزوجه الدم وتزود تكون الجلطات واشهرها اورام البنكرياس وبعض اورام الرئه
في علاحات في لاورام من ضمن اعراضها الجانبيه زياده تكون الجلطات اهمها التاموفين او النولفادكس وكمان ادويه علاج الميلوما المتعدده
في حاجات كتير بتساعد علي تكوين الجلطه وخطورته ان الجلطه دي ممكن تتحرك وتروح اعضاء مهمه زي القلب او الرئه او المخ وتعمل مشاكل كبيره
طب العيان يشك ازاي ان يمكن يكون عنده جلطه
الساق او الذراع يورم ويسخن ويحمر
ويبقي في الم اثتاء الحركه او يعوق الحركه
خصوصا في سمانه الرجل او في الذراع
لما يحصل اي حاجه من دي اجري علي دكتورك لان في احتمال لوجود جلطه
تشخيص الجلطه سهل اوي بعمل دوبليكس دوبلار علي شرايين الساق او الذراع
وطبعا في بروتوكولات مخصوصه لعلاج الجلطات دي
علشان تتجنب حدوث الجلطات
تعمل تمرينات للذراع خصوصا اللي ناحيه عمليه استئصال الغدد تحت الباط
الحركه الدائمه ولو حتي البسيطه وما تنامش كتير في السرير ولو مش قادر عالاقل حرك رجلك او شد عضالاتك وانت نايم كانك بتمشي
شرب الميه والسوائل علشان تزود سيوله الدم
بعض العيانين بنديهم ادويه بسيطه للسيوله دائمه
وطبعا انك تجري علي دكتورك عند حدوث اي من الاعراض اللي قلت عليها
اخر حاجه وانا خليتها في الاخر لاهميتها ,,
التدخين بيزود احتمالات الجلطات في عيانين الاورام للضعف
النيكوتين بيزود لزوجه الدم وكمان بينتف جدار الاورده والشرايين فبيخليها اكثر عرضه لتكوين الجلطات
وفيه ابحاث كمان ان النيكوتين بيقلل عمل وكفاءه العديد من انواع الكيماوي والهرموني كمان
فممنوع منعا باتا التدخين لمرضي الاورام
